Cefndir
Mae Mentrau Iaith yn hyrwyddo defnydd y Gymraeg ym mhob agwedd ar fywyd yn eu cymunedau lleol. Sefydlwyd y Fenter Iaith gyntaf yn 1991, ac erbyn hyn mae 22 Menter Iaith yn gwasanaethu pob rhan o Gymru. Lleolir swyddfa Menter Iaith Sir Ddinbych yn Ninbych, ac rydym yn gweithio ar draws y sir o Brestatyn a Rhyl yn y gogledd, i fyny Dyffryn Clwyd ac at Llangollen a Chorwen yn y de.
Gwaith Menter Iaith Sir Ddinbych
Mae’r Mentrau Iaith yn un o bartneriaid allweddol Llywodraeth Cymru ac yn gweithredu ar lawr gwlad i wireddu amcanion Cymraeg 2050: Strategaeth y Gymraeg sy’n nodi sut bydd Llywodraeth Cymru yn cyrraedd y targed o filiwn o siaradwyr Cymraeg erbyn y flwyddyn 2050. Mae pob Menter Iaith yn gweithredu mewn ffordd unigryw yn ddibynnol ar anghenion lleol.
Ein prif feysydd gwaith yma yn Sir Ddinbych yw:
Teuluoedd: Mae ein gweithgareddau a phrosiectau yn annog trosglwyddo’r iaith yn y cartref, tynnu sylw at fanteision dewis Addysg Gymraeg, a chefnogi defnydd o’r Gymraeg o fewn gwasanaethau gofal a chwarae.
Plant a Phobl Ifanc: Rydym yn gweithredu i gynyddu’r ddarpariaeth hamdden a chymunedol ar gyfer plant a phobl ifanc er mwyn rhoi cyfle iddynt ddefnyddio’r Gymraeg yn gymdeithasol tu allan i’r ysgol.
Y Gymuned: Trwy gydweithio â siaradwyr Cymraeg a dysgwyr yn eu cymunedau eu hunain rydym yn gweithio i gryfhau’r iaith fel iaith gymunedol, naturiol. Mae gan y Mentrau Iaith amcanion sy’n gweithio tuag at annog i bobl ddyblu eu defnydd o’r Gymraeg.
Prif Gyfrifoldebau’r swydd:
- Gweithio gyda staff eraill Menter Iaith Sir Ddinbych i drefnu a chynnal gweithgareddau blaengar a phoblogaidd sydd yn defnyddio’r Gymraeg fel cyfrwng cyfathrebu naturiol a hwyliog;
- Datblygu a gwerthuso gweithgareddau penodol a flaenoriaethwyd yng nghynlluniau Menter Iaith Sir Ddinbych, yn arbennig rhai i blant, teuluoedd a phobl ifanc;
- Cynorthwyo’r Swyddog Cyllid i reoli gwariant cyllideb gweithgareddau’r Fenter;
- Cydweithio â phartneriaid y Fenter i gefnogi unrhyw weithgaredd sy’n bodoli eisoes trwy gyfrwng y Gymraeg a llenwi bylchau yn y ddarpariaeth bresennol;
- Cynorthwyo i greu a pharatoi deunyddiau marchnata a datblygu ymgyrchoedd marchnata penodol fel bo’r angen;
- Cynorthwyo i weithredu Cynllun Marchnata’r Fenter a chodi ei phroffil lleol a chenedlaethol;
- Mynychu cyfarfodydd ar ran y Fenter fel bo angen.
Manyldeb Person
Meini prawf angenrheidiol:
- Yn ymrwymedig i’r Gymraeg ac yn frwdfrydig dros ei hyrwyddo
- Profiad o weithio’n ddwys gyda theuluoedd, plant a/neu bobl ifanc
- Yn meddu ar syniadau blaengar a chreadigol
- Yn gallu gweithio’n effeithiol ac yn hyblyg fel aelod o dîm ac yn annibynnol
- Yn gallu cydweithio ac ysbrydoli eraill
- Yn drefnus ac effeithiol
- Yn meddu ar sgiliau cyfathrebu da, a hynny’n rhugl ddwyieithog Cymraeg / Saesneg) ar lafar ac ysgrifenedig
- Yn meddu ar sgiliau technoleg gwybodaeth da
- Trwydded yrru a defnydd o gar ar gyfer teithio perthnasol i, ac o fewn y gwaith yn hanfodol
Meini prawf manteisiol:
- Byddai adnabyddiaeth o’r ardal yn fanteisiol
- Byddai Gradd neu safon addysg uchel o fantais
- Byddai cymhwyster a / neu brofiad o ddiogelu plant yn fanteisiol
Rhagor o fanylion
Swydd Newydd: Swyddog Datblygu Cymunedol | Menter Iaith Sir Ddinbych
Os hoffech ragor o fanylion am y swydd neu sgwrs anffurfiol cysylltwch â
Ruth Williams, Prif Swyddog ar 01745 812822 neu ruth@misirddinbych.cymru