Chwilio am bethau i chi neu’r plant wneud yn y cartref? Dyma rai syniadau:
Apiau Cymraeg:
Mae sawl ap Cymraeg yn bodoli bellach ar gyfer plant bach gan gynnwys rhai wedi’u creu gan y Mentrau Iaith fel Magi Ann, Selog a Bys a Bawd. Mae rhestr o rai apiau yma.
Ap arall all fod o ddefnydd i chi dros y cyfnod ansicr hwn yw Ap Cwtsh i’ch helpu i fyfyrio ac ymlacio.
Gall ap AM hefyd eich cadw’n brysur gyda’r sianeli Gwylio, Gwrando, Geiriau, Gigs a Gwyliau yn cael eu diweddaru’n aml i arddangos y gorau o’r celfyddydau yng Nghymru.
Cerddoriaeth, radio a podcast:
Gyda ffrydio cerddoriaeth mor hawdd i‘w wneud erbyn hyn, mae llu o restrau chwarae Cymraeg ar gael ar lein sy’n addas i bob oedran a chwaeth cerddorol. Chwiliwch am restrau chwarae Dydd Miwsig Cymru ar eich systemau ffrydio neu defnyddiwch BBC Sounds i chwilio am restrau chwarae Radio Cymru.
Bydd Radio Cymru yn parhau i ddarlledu cynnwys di-ri i’n setiau radio gyda podcasts o bob math ar gael ar BBC Sounds.
Technoleg:
Bydd technoleg yn dod yn rhan fwy o’n bywydau ni wrth i ni dreulio mwy o amser gartref yn y misoedd nesaf. Ond, mae pethau cadarnhaol y gallwch chi eu gwneud er mwyn cynyddu presenoldeb y Gymraeg ar dechnoleg.
Beth am gymryd rhan yn ymgyrch Common Voice Cymraeg gan gyfrannu eich llais neu ddilysu? Ewch i voice.mozilla.org/cy am fwy o wybodaeth.
Mae hefyd modd i unrhyw un greu neu gyfieithu erthygl ar Wicipedia Cymraeg. Gwyliwch y fideos hyn gan Menter Iaith Môn am fwy o wybodaeth.
Hoffi flogs? Mae nifer cynyddol o flogs a fideos hwyliog yn bodoli ar Youtube. O fideos doniol a diddorol Hansh i fideos gemau fideo fel sianel Yn Chwarae – mae rhywbeth i ddiddanu pob blas. Neu beth am greu flog eich hunan gan ddefnyddio tips gan Fideo Fi?!
Darllen:
Yn hoff o ddarllen? Beth am ddefnyddio’r cyfnod tawel i ddal fyny efo’r pentwr o lyfrau Cymraeg? Mae’n bosib bydd eich siop lyfrau lleol yn hapus i bostio llyfrau i chi.
Mae sawl cylchgrawn Cymraeg bellach ar gael – Cara, Selar, Stamp, Codi Pais, Y Cymro, Barn, Golwg a mwy, a chomics fel Mellten. Gallwch danysgrifio i sawl un ohonynt ar-lein.
Eisiau cefnogi eich papur bro? Mewn cyfnod ansicr, ni fydd modd i wirfoddolwyr y papurau bro gyfarfod i blygu a dosbarthu. Beth am edrych os oes ffyrdd gwahanol o ddarllen storïau bro megis ar wefan Bro360, dros e-bost neu rannu erthyglau ar Facebook?
Teledu:
Wrth ymlacio adref un ffordd o anghofio am yr ansicrwydd o’n cwmpas yw gwylio cyfresi a ffilmiau. Mae digon o ‘nostalgia’ bellach ar S4C Clic yn cynnwys bocsets Jabas, Fideo 9, Amdani, Anturiaethau Syr Wynff a Plwmsan a ffilmiau dirdynnol fel Martha, Jac a Sianco ac addasiad o glasur T Llew Jones, Dirgelwch yr Ogof.
Bydd digon o raglenni i blesio pob oedran hefyd ar S4C gyda Cyw, Stwnsh, Hansh a llawer mwy yn cael eu darlledu ar y sianel.
Dysgu Cymraeg:
Ydych chi’n dysgu Cymraeg? Gallwch ymarfer gyda Duolingo a Say Something in Welsh. Bydd hefyd cyfle i sgwrsio gyda phobl gan ddefnyddio Skype. Cysylltwch gyda’ch Menter Iaith leol neu’ch darparwr Dysgu Cymreg.
Neu beth am wylio’r cynnwys ar S4C sydd wedi eu creu yn benodol i ddysgwyr Cymraeg yma?
Mudiadau:
Cefnogi busnesau bychain:
Os ydych chi’n awyddus i gefnogi’r busnesau bychain yn ein cymunedau, beth am brynu taleb ganddynt i’w ddefnyddio yn y dyfodol? Ffoniwch eich siop leol i weld sut gallwch chi eu cefnogi orau.
Dewch yn aelod o grwp Gweithgareddau Cymraeg Gartref ar Facebook am fwy o syniadau neu ewch i’n calendr digwyddiadau yma.